ಕೋಪ

ಬೇರೆಯವರು ಕೋಪಗೊಂಡಾಗ ಏನು ಮಾಡಬೇಕು?

ಇತರರು ಅಸಮಾಧಾನಗೊಂಡಾಗ ಅದೇ ಸಮಯದಲ್ಲಿ , ನೀವು ಕೂಡ ಅಸಮಾಧಾನಗೊಳ್ಳದಿರಿ. ಯಾರಾದರೂ ನಿಮ್ಮನ್ನು ಬೈಯುತ್ತಿದ್ದರೆ ಅಥವಾ ನಿಮ್ಮ ಮೇಲೆ ಕೂಗಾಡುತ್ತಿದ್ದರೆ , ಅವರನ್ನು ಹಾಗೆಯೇ ಬಿಟ್ಟುಬಿಡಿ. ಇದು ಅವರ ಸಮಯ, ಎಂದುಕೊಂಡು ಬೇಕಾದಂತೆ ವರ್ತಿಸಲು ಅವರಿಗೆ ಸ್ವಲ್ಪ ಸಮಯವನ್ನು ನೀಡಿ. ಆಗ ಮಾತ್ರ ಆ ಸನ್ನಿವೇಶದಲ್ಲಿ, ನೀವೊಬ್ಬ ಪ್ರೇಕ್ಷಕರಾಗಿರುತ್ತೀರಿ. ಆದುದರಿಂದ ನೀವು ಈ ಕಾರ್ಯಕ್ರಮದಲ್ಲಿ ಭಾಗವಹಿಸುತ್ತಿಲ್ಲ,ಎಂದು ಭಾವಿಸಿಕೊಂಡು ಸುಮ್ಮನಿದ್ದು ಬಿಡಿ. ಮತ್ತೊಂದು ಬಾರಿ ನೀವು ಕೂಡ ನಿಮ್ಮ ಮನಸ್ಸಿನ ಸ್ವಾಸ್ಥ್ಯವನ್ನು ಕಳೆದುಕೊಂಡು ಕೂಗಾಡಬಹುದು ಹಾಗೂ ನಿಮ್ಮ ಕೋಪವನ್ನು ತೋರಿಸಬಹುದು. ಆದ್ದರಿಂದ, ಯಾವಾಗಲೂ ಪ್ರತಿಯೊಬ್ಬರೂ ನಟರೇ ಆಗಿಬಿಟ್ಟರೆ, ಆಗ ಅಲ್ಲಿ ಪ್ರೇಕ್ಷಕರಿಲ್ಲದೆ ಸಮಸ್ಯೆ ಉಂಟಾಗುತ್ತದೆ. ಆದುದರಿಂದ ಕೋಪಿಸಿಕೊಳ್ಳಲು, ತಿರುವುಗಳನ್ನು ತೆಗೆದುಕೊಳ್ಳಿ. ಹಾಸ್ಯದ ಮೂಲಕ ಸನ್ನಿವೇಶವನ್ನು ಹಗುರಗೊಳಿಸಿ.ಹಾಸ್ಯವು ಕೋಪಕ್ಕೆ ಅತ್ಯುತ್ತಮ ಮದ್ದು. ನೀವು ಕೇಂದ್ರೀಕೃತವಾಗಿದ್ದರೆ, ಆಗ ತನ್ನಂತಾನೇ ಹಾಸ್ಯವು ನಿಮ್ಮೊಳಗಿನಿಂದ ಉದ್ಭವಿಸಿ ಹೊರಗೆ ಬರುತ್ತದೆ.

ಇದಿಷ್ಟೇ ಅಲ್ಲದೆ, ಯಾವುದೇ ಕಾರಣವಿಲ್ಲದೆ ಯಾರಾದರೂ ತಮ್ಮ ಸ್ಥಿಮಿತವನ್ನು ಕಳೆದುಕೊಂಡು ಕೋಪಗೊಂಡರೆ, ಆ ಕ್ಷಣದಲ್ಲಿ ಅವರ ಪಿತ್ತವು ಸ್ವಲ್ಪ ಹೆಚ್ಚಾಗಿದೆ ಎನ್ನುವುದನ್ನು ತಿಳಿದುಕೊಳ್ಳಿ ಮತ್ತು ಅವರನ್ನು ಶಾಂತಗೊಳಿಸಲು ಅವರಿಗೆ ಸಹಾಯ ಮಾಡಿ. ಅವರಿಗೆ ಸ್ವಲ್ಪ ಐಸ್ಕ್ರೀಮ್, ಹಾಲು ಕೊಡಿ, ಪಿತ್ತವನ್ನು ತಂಪಾಗಿಸಬೇಕಾದರೆ ಏನಾದರೂ ಆಹಾರವನ್ನು ಕೊಡುವುದು ಅಗತ್ಯ.

ನಾನು ಎಂದಿಗೂ ಕೋಪಗೊಳ್ಳಲೇಬಾರದೇ?

ಕೋಪವು ಕೆಟ್ಟದ್ದಲ್ಲ. ಇದು ಕೆಲವು ಕ್ಷಣಗಳ ಕಾಲಕ್ಕೆ ಬಂದು ಹೋದರೆ, ಅದು ಖಂಡಿತವಾಗಿಯೂ ಕೆಟ್ಟದ್ದಲ್ಲ. ಒಂದು ವೇಳೆ ನೀವು ನೀರಿನ ಮೇಲೆ ಒಂದು ರೇಖೆಯನ್ನು ಎಳೆದಾಗ,ಆ ರೇಖೆಯು ನೀರಿನಲ್ಲಿ ಉಳಿಯುವಷ್ಟು ಹೊತ್ತು ಮಾತ್ರ ನಿಮ್ಮ ಕೋಪವು ಕೂಡ ಉಳಿಯಬೇಕು. ಹಾಗೆಂದು ಅಪರೂಪಕ್ಕೆ ಒಮ್ಮೊಮ್ಮೆ, ನಿಮಗೆ ಕೋಪ ಬಂದರೆ, ಆಗ ನೀವೇ ನಿಮ್ಮನ್ನು ದೂಷಿಸಿಕೊಳ್ಳಲು ಪ್ರಾರಂಭಿಸಬೇಡಿ. ಯಾಕೆಂದರೆ ಆಧ್ಯಾತ್ಮಿಕ ಪಥದಲ್ಲಿ ಮುಂದುವರಿಯುತ್ತಿರುವಾಗ, ಸ್ವ-ನಿಂದೆಯು ಅತ್ಯಂತ ಹಾನಿಕಾರಕವಾದ ಪರಿಣಾಮವನ್ನು ಉಂಟುಮಾಡುತ್ತದೆ. ಅಗತ್ಯವಿದ್ದಾಗ ಕೋಪವನ್ನು ತೋರಿಸುವುದು ತಪ್ಪಲ್ಲ, ಆದರೆ ನಿಮ್ಮ ಕೋಪದ ಬಗ್ಗೆ ನಿಮಗೆ ಅರಿವಿಲ್ಲದಿದ್ದರೆ, ಆಗ ಅದು ನಿಮಗೆ ನೋವುಂಟು ಮಾಡುತ್ತದೆ. ಕೆಲವೊಮ್ಮೆ ಅವಶ್ಯಕತೆ ಇರುವಾಗ ನೀವು ಉದ್ದೇಶಪೂರ್ವಕವಾಗಿ ಕೋಪವನ್ನು ತೋರಿಸಬಹುದು. ಉದಾಹರಣೆಗೆ, ಒಬ್ಬ ತಾಯಿಯು ಕೆಲವೊಮ್ಮೆ ತನ್ನ ಮಕ್ಕಳ ಮೇಲೆ ಕೋಪಗೊಳ್ಳಬಹುದು ಮತ್ತು ಅವರು ತಮ್ಮನ್ನು ತಾವು ಅಪಾಯಕರ ಸನ್ನಿವೇಶಗಳಿಗೆ ಒಡ್ಡಿಕೊಂಡಾಗ, ಆಕೆಯು ಅವರ ಮೇಲೆ ಕಠಿಣವಾಗಿ ವರ್ತಿಸಲೂಬಹುದು.

ನಿಮಗೆ ನೀವು ಸಾಮಾನ್ಯ ಸ್ಥಿತಿಯಲ್ಲಿರುವಾಗ ಪರಿಹರಿಸಲಿಕ್ಕೆ ಸಾಧ್ಯವಿಲ್ಲದಿರುವ ಎಷ್ಟೋ ಸವಾಲುಗಳನ್ನು ಎದುರಿಸಲು ಕೆಲವೊಮ್ಮೆ ಕೋಪವು ಸಹಾಯ ಮಾಡುತ್ತದೆ. ಕೆಲವು ಸನ್ನಿವೇಶಗಳಲ್ಲಿ ಇದೇ ಕೋಪವು ನಿಮ್ಮ ಮನಸ್ಸಿನಲ್ಲಿ ಪ್ರೇರಣೆಯನ್ನು ಉಂಟು ಮಾಡಿ ಸಮಸ್ಯೆಯ ಪರಿಹಾರಕ್ಕೆ ನಿಮಗೆ ಸ್ಪೂರ್ತಿಯನ್ನು ತಂದುಕೊಡುವ ಸಾಧ್ಯತೆಯೂ ಇರುವುದು. ಆದರೆ ಇಲ್ಲಿ ನಿಮ್ಮ ಮನಸ್ಸಿನಲ್ಲಿ ಯಾವುದೇ ವಿಧದ ಕಹಿಭಾವನೆ ಅಥವಾ ಹುಳುಕು ಇರಬಾರದು.ಒಂದು ವೇಳೆ ಈ ಕೋಪವು ನಿಮ್ಮೊಳಗೆ ಕಹಿಯನ್ನು ಉಂಟುಮಾಡಿದೆಯೆಂದಾದರೆ, ಆಗ ಅದು ನಿಮ್ಮನ್ನು ಒಳಗೆಯೇ ನುಂಗಿ ಬಿಡುತ್ತದೆ. ಕೋಪವು ನಿಮಗೆ ಹಿತಕರವಾದ ರೀತಿಯಲ್ಲಿ ಉಷ್ಣತೆಯನ್ನೂ ನೀಡಬಹುದು ಮತ್ತು ಇದೇ ಕೋಪವು ಬೆಂಕಿಯ ಹಾಗೆ ನಿಮ್ಮನ್ನು ಸುಡಲೂಬಹುದು. ಕೋಪಗೊಳ್ಳುವುದರಿಂದ ಉಂಟಾಗುವ ಪರಿಣಾಮಗಳನ್ನು ನೋಡಿ. ಕೋಪದಿಂದಿದ್ದಾಗ ನೀವು ತೆಗೆದುಕೊಂಡ ನಿರ್ಧಾರಗಳಿಂದ ಅಥವಾ ನೀವು ಆಡಿದ ಮಾತುಗಳಿಂದ ನಿಮಗೆ ಸಂತೋಷವಾಗಿದೆಯೇ? ಖಂಡಿತವಾಗಿಯೂ ಇಲ್ಲ, ಏಕೆಂದರೆ ಕೋಪಗೊಂಡಾಗ ನೀವು ನಿಮ್ಮ ಸಂಪೂರ್ಣ ಅರಿವನ್ನು ಕಳೆದುಕೊಳ್ಳುತ್ತೀರಿ. ಆದರೆ ನೀವು ಸಂಪೂರ್ಣ ಜಾಗೃತವಾಗಿದ್ದು ಕೋಪದಿಂದ ವರ್ತಿಸುತ್ತಿದ್ದರೆ, ಆಗ ಅದು ಸರಿಯಾಗಿದೆ.

ಯಾವುದೇ ಕಾರಣಕ್ಕೂ ಕೋಪವು ನಿಮಗೆ ಅಂಟಿಕೊಳ್ಳದಿರುವ ಜಾಗೃತಿಯ ಮಟ್ಟಕ್ಕೆ , ನಿಮ್ಮ ಮನಸ್ಸು ತಲುಪಬೇಕಾದರೆ, ನಿಮಗೆ ಸ್ವಲ್ಪ ಸಮಯವು ಬೇಕಾಗುತ್ತದೆ. ಅಲ್ಲಿಯ ತನಕ ವಿವಿಧ ಛಾಯೆಗಳಲ್ಲಿ ಮತ್ತು ವಿವಿಧ ತೀವ್ರತೆಗಳಲ್ಲಿ ಕೋಪವು ಬರುತ್ತಲೇ ಇರುತ್ತದೆ. ನೀವು ಆ ಸ್ಥಿತಿಯನ್ನು ತಲುಪುವ ವರೆಗೆ, ಪ್ರತಿನಿತ್ಯದ ನಿಮ್ಮ ಅಭ್ಯಾಸಗಳನ್ನು ಮುಂದುವರಿಸಿರಿ.ಸುದರ್ಶನ ಕ್ರಿಯೆ, ಪ್ರಾಣಾಯಾಮ ಮತ್ತು ಧ್ಯಾನಗಳು ಇದಕ್ಕೆ ಸಹಕಾರಿಯಾಗಿವೆ.