ಒತ್ತಡ

ನಮ್ಮಲ್ಲಿ ಒತ್ತಡವುಂಟಾದರೆ, ಅದು ನಮ್ಮ ಬದುಕಿನ ಎಲ್ಲಾ ಅಂಶಗಳ ಮೇಲೆ-ಯೋಚನೆಗಳು, ಅನುಭವಗಳು ಮತ್ತು ವರ್ತನೆಗಳು, ಪ್ರತಿಯೊಂದರ ಮೇಲೆಯೂ, ತನ್ನ ಪ್ರಭಾವವನ್ನು ಬೀರಿ, ಪರಿಣಾಮವನ್ನು ಉಂಟುಮಾಡುತ್ತದೆ. ಹಾಗಾಗಿ ನಾವು ಒತ್ತಡಕ್ಕೆ ನಮ್ಮನ್ನು ಆಳುವ ಅವಕಾಶವನ್ನು ಬಿಟ್ಟುಕೊಟ್ಟರೆ, ಅದರಿಂದ ಉಂಟಾಗುವ ದುಷ್ಪರಿಣಾಮಗಳು, ಅತ್ಯಂತ ಹಾನಿಕಾರಕ ಮತ್ತು ದುರಂತಗಳಿಗಿಂತ ಕಡಿಮೆ ಏನು ಅಲ್ಲ. ಆದರೂ ಜನರಿಗೆ ಅದನ್ನು ಬಿಟ್ಟು ಬಿಡುವುದು ತುಂಬಾ ಕಷ್ಟಕರವೆಂದು ಕಾಣುತ್ತದೆ. ನಿಮಗೆ ನಿಮ್ಮ ಬುದ್ಧಿಯ ಮಟ್ಟದಲ್ಲಿ ಇದು ಚೆನ್ನಾಗಿ ತಿಳಿದಿದೆ. “ಅಯ್ಯೋ, ನಾನು ಅಸಮಾಧಾನಗೊಳ್ಳಬಾರದು, ನಾನು ಸಿಟ್ಟಾಗಬಾರದು. ನಾನು ತಾಳ್ಮೆ ಕಳೆದುಕೊಳ್ಳಬಾರದು.” ಎಂದು ಎಷ್ಟೋ ಸಲ ನೀವು ಅಂದುಕೊಳ್ಳುತ್ತೀರಿ. ಆದರೆ ಪ್ರತ್ಯಕ್ಷವಾಗಿ ಇದನ್ನು ನೀವು ಜೀವನದಲ್ಲಿ ಅಳವಡಿಸಿಕೊಳ್ಳುವುದಿಲ್ಲ, ಹಾಗೂ ವಾಸ್ತವದಲ್ಲಿ ಈ ರೀತಿಯಾಗಿ ಬದುಕಲು ನಿಮಗೆ ಸಾಧ್ಯವಾಗುವುದಿಲ್ಲ್ಲ. ನಿಮಗೆ ಅಸಮಾಧಾನವಾದ ಕ್ಷಣದಲ್ಲಿ, ನಕಾರಾತ್ಮಕತೆಯು ಪ್ರವಾಹದಂತೆ ಬಂದು, ನಿಮ್ಮ ಬುದ್ಧಿಯನ್ನು ಮೀರಿ ಹೋಗುತ್ತದೆ ಹಾಗೂ ಆಗ ನೀವು ನಿಮ್ಮ ಸಮತೋಲನವನ್ನು ಕಳೆದುಕೊಳ್ಳುತ್ತೀರಿ.

ನಿಮಗೆ ಮನೆಯಲ್ಲಾಗಲಿ ಅಥವಾ ಶಾಲೆಯಲ್ಲಾಗಲಿ, ಇಂತಹ ಸನ್ನಿವೇಶಗಳು ಎದುರಾದಾಗ, ಅವುಗಳನ್ನು ಹೇಗೆ ನಿಭಾಯಿಸಬೇಕೆಂದು ಹೇಳಿ ಕೊಟ್ಟಿಲ್ಲ. ಇಲ್ಲಿ ಸುದರ್ಶನ ಕ್ರಿಯೆಯು ನಿಮಗೆ ಅತ್ಯುತ್ತಮವಾದ ರೀತಿಯಲ್ಲಿ ಸಹಾಯಕ್ಕೆ ಬರುತ್ತದೆ. ನಿಮ್ಮಲ್ಲಿ ಉದ್ಭವಿಸುವ ಭಾವನೆಗಳ ಪ್ರವಾಹವನ್ನು ಜಯಿಸಲು, ಇದು ನಿಮಗೆ ಸಹಾಯ ಮಾಡುತ್ತದೆ. ಇದು ನಿಮ್ಮೊಳಗೆಯೇ ಇರುವ ಒಂದು ದಿವ್ಯವಾದ ಸಾಧನವಾಗಿದೆ -ನಿಮ್ಮಲ್ಲಿ ರೂಪುಗೊಂಡ ಒಂದು ಗೋಡೆಯಂತೆ, ಇದು ನಿಮ್ಮಲ್ಲಿರುವ ಎಲ್ಲಾ ನಕಾರಾತ್ಮಕ ಭಾವನೆಗಳನ್ನು ಸುಲಭವಾಗಿ ಹೊಡೆದೋಡಿಸಲು ಸಹಕಾರಿಯಾಗುತ್ತದೆ.