क्रोध

दुसरे कोणी क्रोधित झाले असल्यास काय करावे?

जेव्हा दुसरे कोणी तुमच्यावर नाराज असते, त्याचवेळी तुम्ही देखील त्या व्यक्तीवर नाराज होवू नका. एखादी व्यक्ती ओरडत असेल तर त्यांना ओरडू द्या. हा त्यांचा वेळ आहे. त्यांना त्यांचा वेळ द्या. तुम्ही प्रेक्षक बना. त्या खेळात तुम्ही सामील होऊ नका. नंतर केव्हातरी तुम्ही क्रोधित होऊन आरडाओरडा करा ! तुमचा राग दाखवा ! कसं आहे, जेव्हा प्रत्येकजण खेळात भाग घेतो आणि कोणीही प्रेक्षक उरत नाही तेव्हा प्रश्न निर्माण होतो ! आळीपाळीने क्रोधित व्हा ! आनंद घ्या ! विनोद हा रागावरचा उतारा आहे. जेव्हा तुम्ही केंद्रित असता तेव्हा आपोआप विनोद येतोच.

तसेच जेव्हा एखाद्याला कारणाशिवाय राग येतो तेव्हा त्याचे पित्त वाढलेले आहे हे लक्षात घ्या. त्यांना शांत होण्यासाठी मदत करा. पित्त शांत करण्यासाठी त्यांना दूध, आईसक्रीम या सारखे पित्त कमी करणारे पदार्थ देणे आवश्यक आहे.

मला कधीच राग यायला नको का?

राग वाईट नाही. राग काही सेकंदासाठी टिकला तर ठीक आहे. जितका वेळ पाण्यावर ओढलेली रेषा टिकते, तितका वेळ राग राहायला हवा. कधीतरी राग आला तर स्वतःला दोष देऊ नका. आध्यात्मिक मार्गावर अतिशय हानिकारक ठरणारी एक गोष्ट म्हणजे स्वतःला दोष देणे. रागाचे प्रदर्शन करणे चुकीचे नाही; परंतु आपल्या रागाब‌द्दल अनभिज्ञ असल्यामुळे स्वत:लाच त्रास होतो. कधीकधी तुम्ही मुद्दाम राग दाखवू शकता. उदाहरणार्थ मुलाने काहीतरी हानी पोहोचवणारे केले तर आई त्याच्यावर चिडते, कडकपणे वागते किंवा ओरडते देखील!

क्रोधामुळे तुम्ही अशी आव्हाने स्वीकारता जी तुम्ही सामान्यतः स्वीकारली नसती. ही खूप मोठी आंतरिक प्रेरणा असते. परंतु कडवटपणा नसेल तरच ! जर रागामुळे तुमच्यात कडवटपणा निर्माण झाला तर तो तुम्हाला आतून खाऊन टाकतो. क्रोध हा असा अग्नि आहे जो तुम्हांला ऊब देऊ शकतो किंवा तुम्हाला जाळून देखील टाकू शकतो.

क्रोधित होण्याचे परिणाम पहा. रागाच्या भरात तुम्ही घेतलेले निर्णय किंवा बोललेले शब्द याबद्दल तुम्ही आनंदी आहात का ? नाही ! कारण तुम्ही तुमची सजगता गमावली आहे. परंतु तुम्ही पूर्णपणे सजग आहात आणि क्रोधित झाला आहात तर ठीक आहे.

क्रोध तुम्हाला स्पर्श करू शकणार नाही अशा स्थितीपर्यंत येण्यासाठी तुम्हाला वेळ लागेल. क्रोध वेगवेगळ्या छटांमध्ये आणि तीव्रतेमध्ये येत राहील. तोवर तुमची साधना करत राहा. सुदर्शन क्रिया, प्राणायाम आणि ध्यानामुळे फायदा होईल.