ಯೋಗದಿಂದ ಸ್ಕೊಲಿಯೋಸಿಸನ್ನು ನಿಭಾಯಿಸುವ ರೀತಿ

ಮಾನವರ ಬೆನ್ನೆಲುಬು ಅನೇಕ ಕಶೇರುಖಂಡಗಳಿಂದ, ಬೆನ್ನು ಮೂಳೆಗಳಿಂದ ಮಾಡಲ್ಪಟ್ಟಿದೆ ಮತ್ತು ಇವು ಮಿದುಳು ಬಳ್ಳಿಯನ್ನು ರಕ್ಷಿಸಿ ಅದಕ್ಕೆ ಆಧಾರವಾಗಿವೆ. ಈ ಮೂಳೆಗಳ ಗುಂಪಿನಿಂದಾಗಿ ನೇರವಾಗಿ ಎದ್ದುನಿಲ್ಲಲು ನಮಗೆ ಸಾಧ್ಯವಾಗುತ್ತದೆ. ಬೆನ್ನೆಲುಬಿನ ಮೂಳೆಗಳ ರೋಗವಾದ ಸ್ಕೊಲಿಯೋಸಿಸ್ನಲ್ಲಿ ಬೆನ್ನುಮೂಳೆಗಳು ನೇರವಾಗಿರದೆ ವಕ್ರವಾಗಿರುತ್ತದೆ. ಬೆನ್ನಮೂಳಿನ ವಕ್ರತೆಯು ಎಡಗಡೆಗೆ ಅಥವಾ ಬಲಗಡೆಗೆ ಅಥವಾ ಹಿಂದಕ್ಕೆ ಅಥವಾ ಮುಂದಕ್ಕೆ 10 ಡಿಗ್ರಿಗಳಿಂತಲೂ ಹೆಚ್ಚು ವಕ್ರವಾಗಿದ್ದರೆ, ಆ ವ್ಯಕ್ತಿಯು ಸ್ಕೊಲಿಯೋಸಿಸ್ನಿಂದ ಬಳಲುತ್ತಿದ್ದಾರೆ ಎನ್ನಬಹುದು.

ಜಗತ್ತಿನಾದ್ಯಂತ 0.5% ನಷ್ಟು ಜನಸಂಖ್ಯೆಯು ಈ ಸ್ಥಿತಿಯಿಂದ ಬಳಲುತ್ತಿದ್ದು ಪುರುಷರಿಗಿಂತಲೂ ಮಹಿಳೆಯರಲ್ಲಿ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತದೆ.

ಈ ಸ್ಥಿತಿಯನ್ನು ಸರಿಪಡಿಸುವ ಕ್ರಮಗಳು

ಸ್ಕೊಲಿಯೋಸಿಸ್ನಿಂದ ಒಬ್ಬರ ಚಲನವಲನಗಳು ಸೀಮಿತವಾಗಿ, ಬಹಳ ವೇದನಕರವಾಗಿರಲು ಸಾಧ್ಯ. ಸ್ಕೊಲಿಯೋಸಿಸ್ನಿಂದ ಬಳಲುತ್ತಿರುವವರಿಗೆ ಶಸ್ತ್ರ ಚಿಕಿತ್ಸೆಯು ಪ್ರಸಿದ್ಧವಾದ ಆಯ್ಕೆಯಾದರೂ, ಶಸ್ತ್ರ ಚಿಕಿತ್ಸೆಯನ್ನು ಮಾಡಿಸಿಕೊಳ್ಳುವ ಮೊದಲು ಇತರ ಸರಿಪಡಿಸುವ ಕ್ರಮಗಳತ್ತವೂ ನೋಡಿ. ಇಂದು ಲಭ್ಯವಾಗಿರುವ ಅನೇಕ ಆಯ್ಕೆಗಳಲ್ಲಿ ಯೋಗ ಅತೀ ಪರಿಣಾಮಕಾರಿಯಾಗಿದ್ದು, ಅತ್ಯಧಿಕ ಕಾಲದಿಂದಲೂ ಲಭ್ಯವಾಗಿರುವ ಆಯ್ಕೆಯಿದು. ಈ ಪ್ರಾಚೀನ ಪ್ರಕ್ರಿಯೆಯು ಕೇವಲ ದೈಹಿಕವಾಗಿ ಮಾತ್ರವಲ್ಲದೆ ಮಾನಸಿಕವಾಗಿಯೂ ಸಹಾಯಕ್ಕೆ ನಿಂತು, ಸ್ಕೊಲಿಯೋಸಿಸ್ನಿಂದ  ಬಳಲುತ್ತಿರುವವರಿಗೆ ಸಹನೆಯನ್ನು ಮತ್ತು ನೋವನ್ನು ಮೀರುವ ಮನೋಸ್ಥೈರ್ಯವನ್ನೂ ಕೊಡುತ್ತದೆ.

ಬದಲಾವಣೆಗೆ ಸಿದ್ಧತೆ

ದೇಹದ ಬಹುತೇಕ ತೂಕವನ್ನು ಬೆನ್ನೆಲುಬು ಹೊರುವುದರಿಂದ ಅದು ನಿರಂತರವಾದ ಒತ್ತಡದಲ್ಲಿರುತ್ತದೆ.
ಸ್ಕೊಲಿಯೋಸಿಸ್ನ ಸ್ಥಿತಿಯಲ್ಲಿ ಈ ನೋವು ಮತ್ತಷ್ಟು ಉಲ್ಬಣಿಸುತ್ತದೆ. ಯೋಗಾಭ್ಯಾಸದಿಂದ ಕಾಲಿನ ಸ್ನಾಯುಗಳು ಬಲಿಷ್ಠವಾಗಿ, ಬೆನ್ನೆಲುಬಿನ ಮೇಲಿರುವ ಬಹಳಷ್ಟು ಒತ್ತಡವನ್ನು ತೆಗೆದುಬಿಡುತ್ತದೆ. ಯೋಗಾಭ್ಯಾಸವು ಉಸಿರಾಟದ ಪ್ರಕ್ರಿಯೆಗಳನ್ನು ಮತ್ತು ಬೆನ್ನೆಲುಬಿನ ಸ್ಥಿತಿಯನ್ನು ಸರಿಪಡಿಸುವಂತಹ ನಿರ್ದಿಷ್ಟ ಯೋಗಾಸನಗಳನ್ನೂ ಒಳಗೊಂಡಿದೆ. ದೇಹವು ಯೋಗಾಸನಗಳಿಗೆ ಒಗ್ಗುವವರೆಗೂ ಆರಂಭದಲ್ಲಿ ಸ್ಪಲ್ಪ ನೋವು ಕಾಣಿಸಿಕೊಳ್ಳಬಹುದು. ಆದರೆ ಕ್ರಮೇಣವಾಗಿ ಈ ನೋವು ಕಡಿಮೆಯಾಗಿ ದೀರ್ಘಾವಧಿಯಲ್ಲಿ ನಿಮಗೆ ಸಹಾಯ ಮಾಡುತ್ತದೆ. ಆದ್ದರಿಂದ ಕೆಲವು ಸರಳವಾದ ಯೋಗಾಸನಗಳಿಂದ ಆರಂಭಿಸೋಣ. ಇವುಗಳಿಂದ ನಿಮ್ಮ ಸ್ಕೊಲಿಯೋಸಿಸ್ನ ನಿವಾರಣೆಯಾಗಿ ನಿಮ್ಮ ಬೆನ್ನೆಲುಬು ಮತ್ತೆ ಸರಿಯಾದ ಆಕಾರವನ್ನು ಪಡೆದುಕೊಳ್ಳುತ್ತದೆ.

ವೀರಭದ್ರಾಸನ

ಈ ಭಂಗಿಯಿಂದ ಸ್ಥೈರ್ಯ, ರಮ್ಯತೆ ಮತ್ತು ಶಾಂತಿಯನ್ನು ದೇಹಕ್ಕೆ ತರುತ್ತದೆ. ಬೆನ್ನೆಲುಬಿನ ಕೆಳಭಾಗವು ಬಲಿಷ್ಠವಾಗುವುದರಿಂದ ದೇಹದ ಸಮತೋಲನವು ಹೆಚ್ಚಿ, ದೇಹದಾಢ್ರ್ಯತೆಯೂ ಹೆಚ್ಚುತ್ತದೆ. ಬಲಿಷ್ಠವಾದ ಕೆಳ ಬೆನ್ನೆಲುಬಿನಿಂದ ಸ್ಕೊಲಿಯೋಸಿಸ್ನ ನಿಭಾವಣೆ ಸುಲಭವಾಗುತ್ತದೆ..

ತ್ರಿಕೋಣಾಸನ

ತ್ರಿಕ್ರೋಣಾಸನದ ನಿಂತಿರುವ ಭಂಗಿಯಿಂದಾಗಿ ಬೆನ್ನೆಲುಬು ವಿಸ್ತಾರವಾಗಿ, ದೈಹಿಕ ಹಾಗೂ ಮಾನಸಿಕ ಸಮತೋಲನವೂ ಹೆಚ್ಚುತ್ತದೆ. ಒತ್ತಡವನ್ನು, ಬೆನ್ನಿನ ನೋವನ್ನು ಈ ಆಸನವು ಕಡಿಮೆ ಮಾಡುತ್ತದೆ.

 

ಮಾರ್ಜರಿ ಆಸನ

ಕೈಗಳ, ಮಂಡಿಗಳ ಮೇಲೆ ಊರಿ ಬೆಕ್ಕಿನ ಭಂಗಿಯನ್ನು ಮಾಡಬೇಕಾಗುತ್ತದೆ. ಇದರಿಂದ ಬೆನ್ನೆಲುಬಿನ ನಮ್ಯತೆ ಹೆಚ್ಚುವುದಲ್ಲದೆ ರಕ್ತ ಚಲನೆಯೂ ಹೆಚ್ಚಿ ಮನಸ್ಸು ವಿರಾಮವನ್ನು ಪಡೆಯುವುದರಿಂದ ಸ್ಕೊಲಿಯೋಸಿಸ್ನಿಂದ ಬಳಲುತ್ತಿರುವವರಿಗೆ ಇದು ಬಹಳ ಒಳ್ಳೆಯದು.

ಶಿಶು ಆಸನ

ಕುಳಿತು ಮಾಡುವ ಶಿಶು ಆಸನದಿಂದ ನರವ್ಯವಸ್ಥೆಯು ಪ್ರಶಾಂತವಾಗುತ್ತದೆ.ಮತ್ತು ಕೆಳಬೆನ್ನೂ ವಿಶ್ರಮಿಸುತ್ತದೆ.  ನರಗಳ-ಸ್ನಾಯುಗಳ ರೋಗಗಳಿಂದಾಗಿ ಸ್ಕೊಲಿಯೋಸಿಸ್ನಿಂದ ಬಳಲುತ್ತಿರುವವರಿಗೆ ಈ ಭಂಗಿಯು ಅತೀ ಉತ್ತಮವಾದದ್ದು.

 

ಪಶ್ಚಿಮೊತ್ತಾಸನ

ಈ ಭಂಗಿಯಲ್ಲಿ ಕೆಳಬೆನ್ನಿನ ವಿಸ್ತರಣೆಯಾಗಿ ಒತ್ತಡದ ನಿವಾರಣೆಯಾಗುತ್ತದೆ. ಒತ್ತಡ, ದಣಿವನ್ನೂ ಇದು ನಿವಾರಿಸಿ ಮನಸ್ಸನ್ನು ಪ್ರಶಾಂತವಾಗಿಡುತ್ತದೆ.

ಅಧೋಮುಖಶ್ವಾನಾಸನ

ಈ ಯೋಗಾಸನದಿಂದ ಬೆನ್ನುಮೂಳೆಯ ವಿಸ್ತರಣವಾಗಿ ಇಡೀ ದೇಹ ಬಲಿಷ್ಠವಾಗುತ್ತದೆ, ವಿಶಿಷ್ಟವಾಗಿ ಭುಜಗಳು, ತೋಳುಗಳು, ಕಾಲುಗಳು ಮತ್ತು ಪಾದಗಳು ಬಲಿಷ್ಠವಾಗುತ್ತವೆ. ಈ ಯೋಗಾಸನದಿಂದ ದೇಹದ ತೂಕವನ್ನು ಕಾಲುಗಳಿಗೆ ಬಹಳಷ್ಟು ಹಂಚಬಹುದಾದ್ದರಿಂದ ಬೆನ್ನಮೂಳೆಯ ಮೇಲಿನ ಒತ್ತಡವು ಕಡಿಮೆಯಾಗುತ್ತದೆ.

 

ಸೇತು ಬಂಧಾಸನ

ಈ ಆಸನವು ಬೆನ್ನೆಲುಬನ್ನು, ಬೆನ್ನಿನ ಸ್ನಾಯುಗಳನ್ನು ವಿಸ್ತರಿಸಿ, ಬಲಿಷ್ಠವಾಗಿಸುತ್ತದೆ. ಒತ್ತಡಾತಂಕವನ್ನೂ ಇದು ನಿವಾರಿಸಿ ಮೆದುಳನ್ನು ಪ್ರಶಾಂತವಾಗಿಡುತ್ತದೆ.

ಶಲಭಾಸನ

ಶಲಭಾಸನದಿಂದ ಇಡೀ ಬೆನ್ನು ನಮ್ಯವಾಗಿ, ಬಲಿಷ್ಠವಾಗುತ್ತದೆ. ದೇಹದ ಒತ್ತಡ, ದಣಿವು ಮತ್ತು ಕೆಳ ಬೆನ್ನಿನ ನೋವಿನ ನಿವಾರಣೆಯಾಗುತ್ತದೆ.

 

ಸರ್ವಾಂಗಾಸನ

ಸರ್ವಾಂಗಾಸನದಿಂದ ಬೆನ್ನೆಲುಬು ನಮ್ಯವಾಗುತ್ತದೆ ಮತ್ತು ಭುಜಗಳು ಹಾಗೂ ತೋಳುಗಳು ಬಲಿಷ್ಠವಾಗುತ್ತವೆ. ಈ ಯೋಗಾಸನದಿಂದ  ಮನಸ್ಸೂ ವಿಶ್ರಮಿಸುತ್ತದೆ.

ಶವಾಸನ

ಎರಡು ನಿಮಿಷಗಳ ಕಾಲ ಶವಾಸನದಲ್ಲಿ ಮಲಗಿ ನಿಮ್ಮ ಯೋಗಾಭ್ಯಾಸವನ್ನು ಮುಕ್ತಾಯಗೊಳಿಸಿ. ಈ ಯೋಗಾಸನವು ನಿಮ್ಮ ದೇಹವನ್ನು ಧ್ಯಾನದ ಸ್ಥಿತಿಗೆ ಕರೆದೊಯ್ಯುವುದಲ್ಲದೆ ಪುನಶ್ಚೇತಕಾರಿಯೂ ಆಗಿರುತ್ತದೆ.